✨ قلموں سے پودے اگانے کا مکمل طریقہ | باغبانی کے آسان ٹپس اور سیزن گائیڈ
باغبانی ایک خوبصورت شوق ہے۔ اگر آپ چاہتے ہیں کہ آپ کے باغ یا گملوں میں مزید پودے ہوں تو قلمی طریقہ (Cuttings) سب سے آسان اور کامیاب طریقہ ہے۔ اس آرٹیکل میں ہم جانیں گے کہ قلم کیسے تیار کی جاتی ہے، کس موسم میں کون سا پودا لگایا جا سکتا ہے اور کامیاب قلمی کے بہترین ٹپس۔
🌱 قلم کیسے تیار کریں؟
- پودے کا انتخاب کریں: وہ پودا منتخب کریں جس کی تعداد بڑھانی ہو۔
- شاخ کاٹنا: صحت مند شاخ لیں جس کی موٹائی کم از کم پنسل کے برابر ہو، شاخ پر 4 سے 7 بڈز ہوں اور 45 ڈگری کے زاویے سے کاٹیں۔
- چھال چھیلنا: نیچے سے تقریباً ایک انچ چھال ہٹا دیں۔
- روٹنگ ہارمون لگانا: شہد اور ایلوویرا جیل برابر مقدار میں ملا کر استعمال کریں، چاہیں تو آدھی چٹکی دارچینی یا ہلدی بھی ڈال سکتے ہیں۔
- مٹی کی تیاری: 40% مٹی، 60% ریت اور تھوڑی سی ورمی کمپوسٹ مکس کریں۔ گملے یا پولی تھین بیگ میں سوراخ لازمی کریں۔
- قلم لگانا: 6 سے 9 انچ لمبی قلم کو 4 سے 5 انچ گہرائی میں لگائیں۔ قلم کے اوپر پولی تھین بیگ چڑھا دیں تاکہ نمی برقرار رہے۔
💧 پانی دینے کا طریقہ
- قلم لگانے کے بعد ایک بار اچھی طرح پانی دیں۔
- جب تک اوپر کی مٹی خشک نہ ہو دوبارہ پانی نہ دیں۔
- 10 دن بعد پولی تھین بیگ ہٹا دیں۔
- ایک ماہ میں قلم پتے نکالنا شروع کر دے گی۔
🌞 قلم لگانے کا موسم
اگرچہ قلمی کا بہترین وقت 15 دسمبر سے 15 فروری ہے، لیکن مختلف پودوں کے اپنے الگ الگ سیزن ہوتے ہیں۔
📋 پودوں اور قلمی موسم کی فہرست
| پودے/درخت کا نام | قلم لگانے کا موسم |
|---|---|
| ٹکوما بیل | اکتوبر تا فروری |
| ہابسکس، چائنہ روز | اکتوبر تا فروری |
| گل عباسی | اکتوبر تا فروری |
| انگور | اگست تا فروری |
| انار | اگست تا فروری |
| گلاب | اکتوبر تا فروری |
| سکھ چین | دسمبر، جنوری، فروری |
| موتیا | اگست تا مارچ |
| پاپولر | جنوری، فروری |
| امرود | جنوری، فروری |
| شیشم (ٹاہلی) | جنوری، فروری |
| سوہانجنا (مورنگا) | اکتوبر تا مارچ |
| انجیر | اگست تا مارچ |
| بوگن ویلیا | نومبر تا جنوری |
| جھمکا بیل | اکتوبر تا فروری |
| املوک (جاپانی پھل) | جنوری، فروری |
| فالسہ | اکتوبر تا فروری |
| شہتوت | جنوری، فروری |
| بیری | دسمبر تا فروری |
| چونگاں | سارا سال |
| پلکن | اکتوبر تا فروری |
| بوہڑ | برسات اور بہار |
| لاجرسٹرومیا | نومبر تا جنوری |
| یوفوربیا | اکتوبر تا فروری |
| گلو وائن | سارا سال |
| چاندنی، چاننا | نومبر تا جنوری |
| کنیر | اکتوبر تا فروری |
| مروا | نومبر تا جنوری |
| جٹروپھا | اکتوبر تا فروری |
| گل چین/چمپا | نومبر، دسمبر |
🌿 خصوصی ٹپس
- سوہانجنا، پیپل اور بوہڑ جیسے درختوں کی موٹی ٹہنیاں بھی لگائی جا سکتی ہیں۔
- منی پلانٹ، پودینہ اور گل دوپہری پانی میں بھی جڑ پکڑ لیتے ہیں۔
- سخت لکڑی والے پودوں کے لیے ائیر لیرنگ اور داب لگانے کا طریقہ زیادہ کامیاب ہوتا ہے۔
💚 باغبانی اور نیکی
یہ ضروری نہیں کہ آپ صرف نرسری کے لیے قلم لگائیں۔ آپ یہ پودے دوسروں کو تحفے میں دے سکتے ہیں۔ یہ عمل صدقہ جاریہ ہے اور آپ کو ثواب بھی ملے گا۔
✍️ تحریر و ترتیب: شجر دوست ملک محمد زمان کھوہاروی
