لہوڑا (لاہوریہ) درخت – فوائد، خصوصیات اور اہمیت | Tecomella undulata

 لہوڑا المعروف لاہوریہ (Tecomella undulata) ایک خوبصورت صحرائی درخت ہے جسے روہیدا اور پرپک بھی کہا جاتا ہے۔ لکڑی، ادویات اور خوبصورتی کے لحاظ سے بے حد قیمتی۔

تعارف

لہوڑا المعروف لاہوریہ (Tecomella undulata) ایک صحرائی درخت ہے جسے عربی میں فرفار، انگریزی میں Tecomella اور تھر کے علاقے میں روہیدا یا پرپک کہا جاتا ہے۔ یہ ایک درمیانے قد کا درخت ہے جو اپنی خوبصورت پھولوں اور معیاری لکڑی کی وجہ سے مشہور ہے۔

---

قدرتی مسکن

• یہ درخت سطح سمندر سے تقریباً 1200 فٹ بلند گرم اور خشک علاقوں میں اگتا ہے۔

• پنجاب کے چکوال اور خوشاب کے جنگلات اور کھوہار گجرات کے قبرستانوں میں عام پایا جاتا ہے۔

• بلوچستان کے علاقے جھالاوان (تحصیل وڈھ، نال اور اطراف) میں اس کی بڑی تعداد موجود ہے۔

• عمان، جنوب مغربی ایران اور شمال مغربی ہندوستان تک یہ قدرتی طور پر اگتا ہے۔

---

پھول اور پتے

• گرمی کی شدت بڑھنے پر درخت پر گہرے اور ہلکے مالٹا رنگ کے خوبصورت پھول کھلتے ہیں۔

• یہ منظر خاص طور پر قبرستانوں اور صحرائی علاقوں میں نہایت دلکش لگتا ہے۔

• اس کے پتے بکریاں اور مویشی شوق سے کھاتے ہیں۔

---

لکڑی کی اہمیت

• لہوڑا کی لکڑی سخت، مضبوط اور دیمک کے خلاف مزاحم ہے۔

• اسے استعمال کیا جاتا ہے:

  • چارپائیوں کے پائے بنانے میں

  • قصائیوں کے گوشت کاٹنے کے کُندے میں

  • دروازے، حل، فرنیچر اور فرش تیار کرنے میں

• بھارت کے راجستھان میں اس کی لکڑی کو "صحرائی ساگون" (Desert Teak) کہا جاتا ہے اور یہ لکڑی کا بنیادی ذریعہ ہے۔

---

دواؤں میں استعمال

مقامی طب (خصوصاً براہوئی علاقے) میں اس کے:

• چھال

• پتے

• جڑیں

کا استعمال کیا جاتا ہے۔ یہ بخار، سوزش اور جلدی بیماریوں کے علاج میں مفید سمجھے جاتے ہیں۔

---

ماحول اور تحفظ

• یہ درخت کئی سالوں تک بغیر بارش کے زندہ رہنے کی صلاحیت رکھتا ہے۔

• بنجر اور نیم صحرائی علاقوں میں یہ ایک اہم قدرتی تحفہ ہے۔

• نئے پودے کم ہی پروان چڑھتے ہیں، اس لیے ان کی دیکھ بھال ضروری ہے تاکہ نسل محفوظ رہے۔

---

مقامی رشتہ

بلوچستان اور پنجاب کے لوگ اس درخت سے لکڑی، دوا اور چرائی کی ضروریات پوری کرتے ہیں۔ اس لیے صدیوں سے پرپک اور مقامی لوگوں کا ایک گہرا تعلق ہے۔

---

✍️ تحریر: ملک محمد زمان کھوہاروی